ایاز....

گیلیکئ چاردانه


از: گیل آوایئ
1

دیله دریا بوبو غوربت روخانه

کرا دایم دوخوانه خانه خانه

کشا گیفته خیالا هائ زنه ونگ

همش گه وا بشم خانه بخانه


2

ایلاهئ عالمه دورئ فوگورده

جودایئ از دیلو دیلبر فوگورده

نبه هرماله آدم دور جه دیلدار

کئ کوه دورئ جا وا دایم فوگورده


3

بهارا دورئ من هانده کونم ساز

نانم دورئ چره دیلا گیره گاز

ایسر غوربت سوجه دیلا بصد ساز

ایسر آ یاده کئ جانا زنه داز



4

ده فریادم ده فریادم ده فریاد

کرا مستئ مئ امرا خانه آواز

گهئ گردم بیجارانه کونم ناز

گهئ گریه کونم توشکا کونم واز



5

دانم بیگانه امرا ده نبم جور

دمردم وا ببم بیگانه جا دور

نخام ده فاندرم بیگانه کیشکا

بشم ایران بسابم من مئ کشکا



6

نخوام هئ جا کرا ایران مئ جایه

غریبه جا آدم بئ جا جیگا یه

دمردم بس بیدم بیگانه آئ وائ

مئ دیل فریاده دیم بئ سر صدایه



7

تئ عکسانا اوسه کون تا بایم حال

کئ بئ تو ده بوبوستم لاب بوشو مال

فارس مئ داد بمردم تاسیانئ

کئ بئ تو بون درم پاک داره بئ خال





8

مرا ده وامرازه غوربت جوخوسم

خایم مئ جاجیگا ایشب بوخوسم

ده ورسفتم جه غوربت داده بیداد

چقد بیگانه جا تا صبح نوخوسم!؟



9

وطن هرماله بئ یاده تو نه سام

بیگیفتم از تئ دورئ پاک سره سام

آکه به شب بشه بایه خوروس خوان

بوشورم غم جه تو با چومه اشکان



10

تمش داران گوماران داره خالان

روخانان آبه نوب دانان بیجاران

چئ چئ نن آب لاکون گوسکانو ماران

چئ خوشکیل بون درد بهاره گیلان


11

بامو نوروزو من غوربت آویرم

نانم تا کئ واسئ غوربت دیمیرم

بازام فکرا شومه هفسینه نوروز

خیالام وا نده تا ول نیگیرم


12

چره واستئ ببه دیکتاتورئ داب

کئ هرتا مجلس ودولت ببه گاب

آکه واستئ آمئ چومان ببه واز

کئ هرماله آمئ رهبر نبه گاب!


13

تو بئ من، بئ تو من تنها چئ واستئ
لوچان زئن کس کسا روسفا چئ واستئ

چئ واستئ وا بیبیم هم دیگه بد خواه

بازین بیگانه همرا بون چئ واستئ!


14

تئ عكســــا كئ خوشادام ول بيگيفتــــــم
چومه اشــــــــكانه امرا سل بيگيفتــــــــم

مئ ديل ناله مئ ديم هيستو بوبوم گورش

شــــــوالا بوم جه دورئ ول بيگيفتـــــــم




15

جودا از تو بوبوم بئ تــــو نوبوم من

بوبو دیل خون ولئ بئ تو نوبوم من

تئ امرا بوم تئ امرا هر جيـــگا بوم

شبــو روز با تو بوم بئ تو نوبوم من




16

كرا دورئ بنــــــا داغا بمـــئ ديل

جه دورئ غم بوبوهمخانه ئ ديل

ده ورسفتم شمه دریا کونم داد

غما دریا فادم دریا آیه داد



17

مئ ماره عكسه امرا شب بوخوفتـــــــــم

مئ مارا ديل بزم تا صبح نوخوفتـــــــــم

فوچه چوم گب بزم هائ ونگ بزم ونگ

نانستم خواب بيدم يا كئ بوخوفتـــــــــم


18

جه تئ دورئ بوبوسته ناله مئ کار

تئ عکسا فان درم با آهه بسیار

وفادارئ نوبو هر ماله تئ کار

منم من کئ بوبوستم تئ گرفتار



19

تئ دیلدارئ نانستیم کئ هاچینه

اسا بئ تو مئ اشکا کئ واچینه

نواستئ دیل فادابیم بئ وفا یار

دباختم دیل دباخته دیل تیشینه


20

بوبوم ولگه اسیرا بوسته در باد

نارم هیجا قرار آئ بئ وفا یار

تئ واستئ واهیلم تنها کونم داد

کئ پاک گورشا بومه از یاره بیداد


21

بیا مئ ور بوکون هرشب مره ناز

کئ بئ تو تنهایئ قورصه زنه ساز

دمردم بسکئ به سام چوم برایئ

نانم دور از من آخه تو چئ خوایئ


22


خیالا شوم مئ دیلام تورا بوسته

جه دیله گریه اشکان خونا بوسته

نشا هرماله آ غوربت نوبون زار

فارس مئ داد کئ مئ دیل پورا بوسته





23


دپرکستم خیالا هائ بزم چو

دیلام پاک ده جمخته گه وطن کو

بخواندم آئ غریبئ داد و بیداد

کئ مئ امرا وطن بیگانه تر بو


24


بوگو یارا کئ تئ یارئ تئ پیشکش

تئ یارئ با تئ غمخوارئ تئ پیشکش

نوا هر شب آمون با ناز مئ خواب

کئ آ خوابو او بیدارئ تئ پیشکش