گورشه تئ نیگایمه
هاچین ترا لیسکا نوکون تئ واستئ من بلایمه

غریبه جا فارس مرا کئ گورشه تئ نیگایمه

بیا مئ امرا قارنوکون آ روزیگاره سخته مئن



کئ بئ تولاب واکفته یم تئ عشقه موبتلایمه

چره مئ دادا نیشتاوئ عالمه گوشا کرا گود

دانئ تئ دیل دباخته یم تئ واستئ گیل آوایمه

وسته ده هائ لوچان زدن هائ مرا دیوانه گودن

ده سر به آسمان زنم دانئ کئ تئ فدا یمه

مئ دیل کرا واهیلا به وختئ ایجور ده فان درئ

خیال کونئ کئ نه سامه پاک ده هاچین پلایمه

وسته ده لاب دمرده یم بئ تو هاچین بمرده یم

چره ترا لیسکا کونئ تئ واستئ پاک بلایمه

شواله یم تئ یاده جا گورشا بویم تئ نازه جا

دباخته یم تیره آغوز ولئ تئ سر برایمه

وختئ مرا شب دواره یاد آورم برقه تئ چوم

جنگله افشانا گودئ نانئ کئ گورشه کایمه

گیل آوایئ وسته گولاز آنقده ماه و نازه ره

چن قده لیسکه یارا گئ هانده تئ چوم برایمه

بئ وفا یار


بئ وفا یاره چئ واستئ تو فدا بوستان درئ

اشکه دریا من دمرده پاک خفا بوستان درئ

یار بوشو وان گرده هرماله ببه تئ امرا پا

بیخودئ انگاره گیفتن چئ بلا بوستان درئ

نه سا ده یارئ ننا وان کون تئ بالا با گولاز
تئ رقیبه امرا گرمه تو فنا بوستان درئ

فان درئ هائ یاره عکسانا کرا با اشکو آه

یار ترا از یاد ببرده تو پلا بوستان درئ

بئ وفایا دیل دوستئ وا بنئ تئ دیلا داغ

وسته روسفایئ کرا بئ دستو پا بوستان درئ

بئ وفایئ دابه ده رسمه وفادارئ بمرد

ماه جوخفت ابرانه پوشت نازه فدا بوستان درئ

گیل آویئ یاره دورئ جا بوبوسته گورشه کا

بئ وفا یارا بوگو تو مئ خودا بوستان درئ

نئ یافئ تو
نئ یافئ هی کسا چون من کئ بئ قراره تو بو
بوسوخته دیل همیشک چوم در اینتظاره تو بو
تئ واستئ پر بدابئ شب خیالا با تئ ناز

تره فدا بوبوبئ لاب ده خاکه رایه تو بو

نئ یافئ مسته تئ چوم مئ مانستن عاشقه زار
تئ واستئ واهیله سرتا به پا وفا یه تو بو

نئ یافئ نه نئ یافئ هیشکئ مئ مانستن پاک

کئ سخته سرده زمانه بنفشه زاره تو بو

نئ یافئ مئ مانسن هائ خیالاشو تا صبح

تئ واستئ واهیلو شیدا همیشه زاره تو بو

نئ یافئ هئ کسا تو مثله من تئ امرا پا

همیشه بئ تو آویرو دو چوم به رایه تو بو

نی یافئ تو مئ مانستن ببه کولئ تو آب

تره نفس بکشه سر و جان فدایه تو بو

گیل آوایئ نوا بوستن هاچین تره بئ تاب

وفا ننا بوگوذشت اون کئ با وفایه تو بو



چئ گورشه کا بوگودئ



نانم دانئ کئ مرا تو چئ گورشه کا بوگودئ

رقیبه تین تره امرا می موشتا وا بوگودئ

نانم دانئ تاوه دائ تئ پالانه شونده کله

تمام مهر و وفایا هاچین هوا بوگودی

نانم دانی کی بوبوستی ایتا پیله ماسکا

آنه اونه ویجا بیخود هورا هورا بوگودی

نانم دانی کی بدای آبرو تیشین برباد

بازین مثاله ایتا شانته دسکلا بوگودی

نانم دانئ کی فقط دیل تره بویی بئ تاب

چره مئ قدرا نداشته هاما فنا بوگودی

نانم چره همه چئ آپچابو چیتینه وفا

مئ دیل تره بزه پر تو آپا اوپا بوگودئ

همیشه دیل تئ وفا ره بوبوسته سنگه صبور

ولئ تو زاکه مانستن هاچین نیگا بوگودئ

گیل آوایئ کرا طوفانه من بوبوسته خاک

هاچین تو لیسکا بویئ پاک مراهوا بوگودئ

تئ صدایا بئ وفا


خیلئ وخته نیشتاوستم تئ صدایا بئ وفا

شاید از خاطر ببردئ گیل آوایا بئ وفا

پورزماته چوم برایم بیشتاوم تئ پا صدا

چئ بوبو جا دئ کرا کتله صدایا بئ وفا

هائ کرا قاقا بومه با مئ پیاله تئ خیال

تو جیگیفتئ آ زمانه تئ صفایا بئ وفا

هائ نیگربانه چره کوره پیچایه گیل آوا

من دمردم هائ تئ رافا تئ خودایا بئ وفا

وستاکون تسکه دیلانا چوم برا نان وائ وائ

روز و شب چوم اینتظارئ تئ صدایا بئ وفا

ول کشه دیل تا دپرکه ان همه بئ سر صدا

تا آکه راه فان درستن یاره پایا بئ وفا

گیل آوایئ از تو گه هر یارو قارا با گولاز

وامرازه بئ تو ایسان بئ دسکلایا بئ وفا


آخه چئ بو


ان همه چوم اینتظارئ جانه من آخه چئ بو

هائ تئ رافا چوم برایئ تئ نامون آخه چئ بو

هائ مرا گفتئ آیم اما نامویئ بئ وفا

بیخود انگاره تره گیفتن شبان اخه چئ بو

ول بیگیفت دیل تا ایتا یاور بایه با ایستکان

شب بوشو روزان بوشو تو بئ وفا آخه چئ بو

یاده کئ گفتئ آیم تا تئ جیگا بئ سر صدا

لندنه بئ صاب بوبو را تا پاریس آخه چئ بو

باد بوگود هفتا بیجارو تایه دئن سرده پلا

ان همه اشپل تئ رافا با کباب آخه چئ بو

کاسه مئن ماستو بورانئ مایئ روده دیبیجا

ودکا یو ویسکئ هاچین بئ همزبان آخه چئ بو

من نانستیم هرچئ گفتئ پاک کرا به خالئ آب

ان همه هول و تکانو چوم برا آخه چئ بو

تو نانئ غوربت سرا به آدمه چارچرخ هوا

ول بیگیفتا چوم برا نان بئ وفا آخه چئ بو

گیل آوایئ کم بوگو یارئ دمرد آ روزیگار

وستا کون هائ آه و ناله بئ وفا آخه چئ بو


گیل آوایئ