بيدين جنگل بيدارا بو بهــــــاره
تی تی خوشكيلا گود آلوچه داره




1

بيدين جنگل بيدارا بو بهــــــاره

تی تی خوشكيلا گود آلوچه داره

ويری ماتم نيگير سرده زمستان

بوگوروخته بوشو هانده بهــــاره


2

تمش داران گوماران داره خــــــــالان

روخانان آبه نوب دانان بیجـــــــــاران

چی چی نن آب لاکون گوسکانو ماران

چی خوشکیل بون درد بهاره گیــــلان


3

گیلان سبزه جه می سبزه بیجــــــاران

می جنگل می روخانان، تی تی داران

خالی واشو چوچـــــــاقو بینه یو راب

کولوشکن، کیشکاجیک جیکه بهاران


4

بامو نوروزو من غوربت آویرم

نانم تا کی واسی غوربت دیمیرم

بازام فکرا شومه هفسینه نوروز

خیالام وا نده تـــــــا ول نیگیرم



5

بهارا دوری من هانده کونم ســــــاز

نانم دوری چره دیــــــــلا گیره گاز

ایسر غوربت سوجه دیلا بصد ساز

ایسر آ یاده کی جــــــــــانا زنه داز



6

بهار، تی چوم؛ قشنگی آفه تابه

سیا دوم، زرده دوم، تی ماهتابه

تویی تو وا واتابی دیل ببه شاد

ناویره قورصه جا دیل وا تورابه




7

تی نوروزا موبارك گويمه من

بنفشـــــــانا تره دسته كونم من

تی رافا نيشتمه چوم اينتظاری

تو نامردی اگه ديــــوانا بم من


8

سرا دن تو خيــــــــالا كم بوخور غم

بوبو دريا ديــــــــــــــلانه امرا هم دم

نوگو از ناتوانی گورشـــــــــا بوستئ

كی هركی سر فوروز باره خوره غم


9

بهـــارام تته رج توندی آيه شه

چـره غوربت نيشه مرابزه شه

خيـــالام تازه ولگه داره شاخه

ايـازه ياده جا های شه بزه شه



10

نی يافم ده آويرا بوسته يـــــــــاره

جوخوسبازئ ده رسمه روزيگاره

گايی سوسو ديهه گايی كونه قــــار

خياله جوفت زنی اون تاك بيـــاره



11

زمستـــانه شبان سرمايوسختئ

سرا شه عاقبت لاتـــــانه لختئ

جه راه آخه رسه سبزه بهاران

آمئ جنگل پورابه سبزه داران


12

گيلان جان می چومه سورمه تی خاكه

می ديله آرزو ده نه تی خــــــــــــــاكه

شبانده روز ايسام تی جنــــــــــگله ياد

می تســـــــكه ديل تی ده نه ره هالاكه



13

شبانا سله مِن گوســــكا بخوانده

پيـــــــــله پا به تومامه پا برانده

هاچین ايمرو نوكون فيسوايفاده

كه خالی مشتی ره نا گابه خنده