شندره
گیلیکئ منظومه
از: گیل آوایئ
هلند



شندره
گیلیکئ منظومه
از: گیل آوایئ
هلند


پیشیکئ گپ
تا هسا کم ناشتیم جه آمئ گیلکان کئ گیلیکئ داستان یا منظومه بوگفته داریدئ جه کسمایئ یو افراشته بیگیر تا آمئ پیله شاعر شیون فومنئ کئ شاید رایا وازا گودید تا بتانیمو بخواییم ایجور امئ گیلیکئ زبانا هم بشناسیمو هم بشناسانیم.

شندره ویشتر مره ایجور نومود داره کئ بخوایم جه آمئ یادا شو آدمان بگم. جه آمئ خاطرا شو به آ دلیل کئ نه دولت اوشونه مرا کار داره نه مردوم کئ ایتا یاور دیدئ!

جه اوشونئ کئ اگه کار بوکونید نان داریدئ اگه مریض بیبید یا پیرا بید هیشکئ نئ یه کئ اوشونه داد فارسه!

اوشونئ که نه بیمه داریدئ نه بازنشستگئ نه ایجیگا ناها کئ اوشونه حق، اگه حقئ یام اوشنه ره بشناسید، دفاع بوکونید!

همیشک میدانه سر کئ شوییم یا رشت ساسانه جولویا دوارستیم، آ ادمانا ده ییم کئ باله کا یا ایتا چارچرخ بدس بار بردان درید زمستانو تابستان برف و سرما یا گرمایو زباله ناشتئ کار گودیدئ یو مانستیم من وختئ کئ ده ییم هی جا ننا کئ جه آشان خبر بیگیره یا آشانه داد فارسه.

هسا کئ سیا روزیگار بوبو داره یو پئر به پسر رحم نئ یه هشانه وضع چوتو یه خودا دانه! ان بو کئ مئ ها فکر و خیال مرا وادشاته کئ بینویسم و بینویشتم!

اولئ کلمه کئ مئ زبان بامو " شندره " بو! و ها منظومه یام به ها نام بینویشتم کئ تقدیم کونم به تومامه بازار مجان- چانچو کشان- ارابه چیان و جه خاطر بوشویانئ کئ مئ شندره مانستن هانده شندره یه ییدئ!

ببه او روز کئ هئ تا آدم شندره نبه یو جه خاطر نشه! ایتا دولت بداریم کئ خو میلته خدمت بوکونه نه حوکومت! نه اینکئ بچاپه! بودوجه وادوجه و بنه بشه!

ایتا دولت کئ مردوم اونا اینتخاب بوکونه و مردومام اونا کنار بنه! مردومه رایه مرا بوجور بشه و مردومه رایه مرا بیجیر بایه! نه اینکئ بوجور بشه و بیجیر آمونه ره هیشکسه خطام نخوانه!

گیل آوایئ

نوامبر 2002

هلند

جیگیفته گپ......


خیلئ زماته کئ خوایم بگم من پاک تورا بم تام بزنم نگم من!؟

زخمه زمانه روزیگاره سختئ آخ کئ آتو نوبوستیبئ چئ بوستئ

هرکه دینئ ایجور کرا خرابه آ روزگاره مئن بیدین چئ دابه

آدمئ لاب آویرا بوستان دره هرکه دینئ هائ خوره شیب زن دره

گرچئ ترا فان دره اما قاقه دمرده پاک واسوخته خوشکه باغه

آیتا کرا یک شئ ره سگ زن دره اویتا کرا خو سره من زن دره

ایتا کرا بندا کونه خودا یا ایتا کرا فوش دیهه کدخودایا

کس ده نده یارئ کرا هیکسا راه دواران هائ فوقوسید کس کسا

آ روزیگار تا بو هاتو بگردست بیچاره آدمانه ره نگردست

ایروز کرا هاتو مره قاقا بوم پاک ایتا سایه مانستن را دوبوم

بیدم کرا شندره راه شون دره بجسته رگ واهیلا بوستان دره

شندره دس دره ایتا عرضه حال کرا شکایت داره از خو زن مار

راه دره پاک بزه بسیمه آخر واکف داره کرا بوبوسته واخر

خوره خوره داد زنه گه جمخته چانه جیویشته مرا هائ واکفته

بمردمه بسکئ بزه سر فوکو کفتاله دس میدیل هاچین خون بوبو

بیرون کرا هاممه ایسید طلبکار خانه میان پاچه گیره مئ زنمار

هرچئ آرم بخانه لبچا کونه نانم چئ واستئ مرا کپچا کونه

هاچین خوره خانه میان تو خوره مرا دینه رام نوکونه موخ خوره

هاتو گه از دار و درختو دیفار من چه دانم از هامه به طلبکار

همساده یو پامساده کوچه بقال دس فوروشو کهنه فوروشو رممال

ایوار نیدم راضئ ببه جه ایچئ پیره زنائ شاکئ یه از هامه چئ

شاخا نیهه هاممه تانا تا غوروب حالئ نیبه کفتالا ده رببو روب

هیشکسه خطا نخوانه لاکیتاب سر فوکو امرا مرا گه بئ سفاد

خیال کونه هاچین بوشوم اکابر آنهمه درس بخواندمه با مئ پئر

مئ ایمضایا هرکئ دینه هذ کونه بازین ها کفتال مره چئ ناز کونه

سفاد دارم یا نارمه بتو چئ کار کونمه یا نوکونم بتو چئ

دیفار کناران دیمیزم بتو چئ سرپا دیمیزم دینمیزم بتو چئ

چره تو مئ کفشو کولا من درئ پاره پینیک بزه قبا من درئ

هرکه دینئ کیف کونه ازخوزنمار نانم چره میشین بوبو تیلیمبار



خانه نارم موستاجرم جهندم نان خورمه پلا نارم جهندم

آخه نانم مئ زن تویئ یا تئ کور جمختئ آخه چئ خوایئ گور بگور

ایوار دینئ سیر قلیه ترا وا ایوار دینئ تورشه تره ترا وا

ایوار خایئ مایئ سیفید اشپلان ایوار خایئ شوره کولمه اشپلان

مورغانه واستئ بیافم شلختئ بازاره من پول یافمه بسختئ

بازین آیم خانه تو بئ طلبکار آنهمه آدم تو کرا بئ زن مار

پاک کرا ده بوبوستئ مئ ماره مرد او پیره مرد چوتو جه تو جان ببرد

آخه آدم پیسه شکم چن قدر پاک ده تئ دس بوبوستمه دربدر

تیدس چقدحرف بوخورم بمردم چقد تو مئ موخا خورئ دمردم

شندره رئ هاتو خوره داد زنه پیاده رو شون دره فریاد زنه

مشته غولام چانچوبکول شون دره زیبیله پور میدانه سر شون دره


پورا گوده زیبیلانا بادمجان گزر کویئ خیار ککج آویزان

والائ خوره چانچوکرا مشتئ کول نفس نفس چف کونه پاک مشتئ جول

داد زنه گه:شندره ره پرا خوار کئ مرا گب زندرئ هائ راه دوا ر

لوچان زنه یانئ تئ رایا بوشو تو چئ دانئ آخه مئ سر چئ بامو

مشته غولام شندره یا وا دیهه خوره گه آ شندره آدم نیبه

شندره رگ بجسته دیوانه یه مشتئ دانه مونتظره بانه یه

خودستانا موشتا گوده شندره شندره دیوانه کرا بون دره

خوامراگه لاب تورابوستان درم تا بوقه سگ دو ومه کفتان درم

بیدین چوتو لاغرا بوم خاشا بوم جه آنهمه جان کنش لاب آبا بوم

چار دسو پا دو ومه باز ماتلم هرکه دینم واستئ بگم چاکرم

آنهمه جان کنش آخه چئ واستئ وخته ایتا زیارتام نوبوستئ

شندره مردومانا ده فان دره هاتو کرا گابکئ فوش دان دره



ایوار انه کله خوره بشلمان رادواران خنده کونید فراوان

شندره رئ دینه هاچین منتره همه تانا فوشا گیره شندره

ایتا جه او رادواران مشتئ یه کرچه کرا شیرابو لاب رشتئ یه

داد زنه گه:تئ خاخورا تو چئ گئ؟ تئ داهانا دود چره فوش دیهئ

شندره فان دره دینه قولدوره جوم بخوره موشته کئ وا بوخوره

شندره گه من شمه را فوش ندام هرکئ مره خنده بوگود فوش بدام

یارو دینه شندره ول ماتله قاپاس زنه شندره پس گردنه

گه کئ بوشو فوش نوا دان مردوما را بوشو بیخود وانه کف مردوما

قاپاس خوره هیچئ نیگه شندره خو دیله من پاک خورا خوردان دره

از ایطرف خانه میانئ زن مار از ایطرف مردومه دس گرفتار

شندره ده خو هفتایا گوما گود تیره کئ هیچئ آقوزام گوما گود

هاتو کرا بفکرا شو شون دره ده گه را خوره شندره کفتان دره

جه صیغلان گرا ده شه حاج آباد دینه قیامته همه کونید داد

آیتا کرا اویتا یقا بیگیفته اویتا کرا آیتا جیگا بیگیفته

واکف داره کومیته چئ پاسبان ایتام کرا داد زنه گه بچرخان

شندره پاک واهیله کئ چئ بوبو فاکش فاکش خوایه بشه تا جولو

یککو انه دسا گیره بسیجئ داد زنه گه اینجا چرا مئ گردئ

شندره ده هاچین مانه قاقا به بد بیارئ امرا کرا داغا به

خایه خو کللا بزنه بدیوار دیوانا به هامما بنه سره دار

بسیجئ یا گه مرا تو وا بدن انهمه آدم تو مرا چو نزن

تو نوگو او بسیجئ یام کله خر توفنگه امرا زنه بیچاره سر

شندره چوم هاچین سیایئ بوشو شندره ده نفهمه کئ چئ بوبو




فوقوفته..............


هیسته چوره زندانه گوشه کفته ایتام اویا گوده بوبوسته کفته

پا اونه شین بترکسه جیجایه خون دیمیرو ورم بوگوده پایه

دیم اونه شین خونه خونالود بوبو جان کرا شلاقه جا اورشین بوبو

خیال کونه شندره کئ بمرده آنکرو مونکر اونه ره باوردد

شندره دیم بوبوسته دیفاره گچ جهندمه من وا ببه پلا پچ





هاتو کرا بفکرا شو کفته بو نانستئ کئ مورده و یا زنده بو

تا کئ دینه بکفته هوشیارا به شندره دستا گیره بیدارا به

آرامه گه فارس مرا بمردم بیشرفانه دس هاچین دمردم

بیدین چوتو بوبوستمه گورشه کا پاک هاتویه آلوغ بیگیفته کیشکا

ایتا کرا قورآنا خو دس بیگیفت کولوفته کابلام خواویتا دس بیگیفت

هاتو قوران خواندئ مئ جانا زه یئ مئ پوشت مئ پا مئ سره تانازه یئ

مئ ناخونا ایتا ایتا بکندد چوتو بگم مئ سر بلا باوردد

آکه ترا باوردده مئ ویرجا چره ترا باوردیدده مئ ویرجا

شندره گه نانم کو یه ایسامه ولئ دانم بچه یه خاریمامم

من هاتوحاج آباد را شون دوبوم کومیته چئ مرا گلاویزا بوم

مرا بزه پسئ باوردید آیه آسام تئ امرا بوبومه همسایه

کرا واورسه کئ سیاسئ نئ یئ اهله موجاهدو فدایئ نئ یئ

بوگفتمه ایلقمه ره ماتلم موجاهدو پوجاهدا چئ دانم

مئ ناما بزور نیویسم تو چئ گئ خوایئ میجان حرف فاکشئ موفتیکئ

شندره ایپچه خودشا جیما گود شکنجه یانا فاندرست شولا گود

واورسه تئ سر چئ بلا باوردید چوتو بوبوسته کئ ترا بیگیفتید

مرا چوتو بیگیفتیدئ ولا کون مئ پایانا ایپچه کرا راستا کون





شندره ده زاله ترک بون دره او زحمانه ده نه جا مردان دره

خو پیرانا پاره کونه شندره زخمانه سر نیهه هاچین چنگره

ایوار دوتا کلاچ ملاچئ شلوار شندره چوما دوستید با نوار

موشتو لقد شندره جانا خوردئ قاپاس کرا هائ سره تانا خوردئ

بکف ویریز فاکش فاکش ببردید شندره بیچارا هاتو واکفتید

هیشکئ نوگفتئ آخه ره شندره زندانه من تو چئ کونئ پندره

تو کئ سیاسئ نئ یه خاکا تئ سر چره هاتو فوقوفتیدئ بتئ سر

شندره هرچئ داد و فریاد بوگود خودایو پیغمبرا فریاد بوگود

هیشکئ نوبو داد فارسه شندرا خوره هاتو موشتو لقد خور دره

یککو ایتا بوگفت آنا شناسم ولا کونید من اونه کارا سازم

شندره از موشتو لقد جیویشته شندره خو تومانه من دیمیشته

شندره یا واورسه تو چئ کردئ فکره آجور جا را چرا نکردئ

شندره یام بوبوسته بو مثله موش یانئ زنید آهینه سردا چوکوش

بوگفته کئ خاستیم بشم داده گا تا جیویزم جه کرده کاره زن مار

مرا هاچین بیگیفته او مایئ خاش(1) بازین مرا لاب بوگوده تورشه آش

1-اصلش آتویه: مرا هاچین واکفته کوس پراخوار، واکف داره چل پدره ایتا مار

من کئ مره توربا مانم بوخودا هیچئ نانم هاچین بوبوم گورشه کا

ایوار ایتا چک بیگیفته شندرا شندره بیچاره هاچین منتره

بداد بامو آخه چرا مئ زنی تو کئ جه اویتا مایئ خاش بدترئ(2)

2- اصلش آتویه: تو کئ جه او کوس پراخار بدترئ

مگه اسیر بیگیفتیدئ آن چئ یه هائ چپو راست دخشاریدئ آن چئ یه

هرچئ خوایم هیچئ نگم واندید مرا چرا چک و لقد مئ زنید

بوگفته کئ من ترا مئ شناسم شولوغ نوکون تا کئ ترا سرا دم

نانم چئ پیچ پیچ بوگوده مردکه ایتام کرا واورسه با دب دبه

نامه تو چیست بوگفته:من شندره ایوار بیده مرداکه خندا دره

یارو بیده شندره خالئ آبه بوگفته شلاق بزه پس سرا ده

ایوار بیده شندره چارچرخ هوا دوسته دستو پا هاچین خوشکه باد

اولئ شلاقا بوخورد شندره درده مرا هاچین بوگود ایجگره

ده تا نوخورده کرا هوش بوشو شندره جانه جا هاچین خون بوشو

شندره دیفاره کشه کفته بو شندره بیچاره هاچین مورده بو

هوا کئ ده تاریکا بوستان دوبو ایتا بامو شندرا آزادا گود

خیال کونئ شندره کفتان دره پاک کرا لالا بو اونا فان دره وامج وامج کمیته جا دورا به شندره سرتاپا هاچین خونا به

شندره پاک بوبوسته قاطئ پاطئ نانه کئ خوابه یا کئ راستئ راستئ

زالاش باورده ویشتا یه شندره ویشتایئ جا شندره مردان دره

ایلقمه نانه هاچینه سگ زنه پلا ناره قاشوقا خو تک زنه

چئ بوکونم چو نوکونم واکفتم چره همش من دکفم جهندم

میکار چره توشکه خوره آن قدر بد بیارئ آن همه آخه چقدر

چره واسئ چوب بوخورم هیچئ ره هاچین ببم خونه خونالو چئ ره

بیخود زنه شندره چانه مانه چاره ناره واستئ بشه بخانه

شندرا یاد آیه دو واره زن مار تورشا کونه موشتا زنه به دیفار

یانئ دو واره وا بشه بخانه بیشتاوه زن ماره گوزه گبانه

چئ بوکونه چاره ناره شندره زن ماره گب ویشتایئ جا بختره

گه کئ شمه زن ماره نازا کشم ایپچه اونه بازاره بارا کشم

هرچئ بگه هیچئ نگم لالا بم مئ زناکه واستئ هاچین گابا بم

خیاله کئ شندره لاب موشا بو شندره زندان بوشو باهوشا بو

فچم فچم را کرا شه شندره شکم روش بیگیفته مردان دره

شندره ده هاچین جه پا دکفته تا فارسه خانه هویا بکفته






دوارسته...........


شندره زن بیرون آیه جه خانه دو تا دسئ زنه خو سرو جانه

همه آیید شندره دور جیما بید شندره زن ماره مرا تورا بید

ایتا آیه شندره بالا گیره اویتا آیه شندره پایا گیره

ایتا آیه شدره ره آب آره اویتا آیه شندره ره نان آره

شندره زن هاچین کرا مه یه ته مثاله همساده توره سیده

شندره پوشتا بیده ده مردومان هرکئ بزه دو دستئ خو سره تان

شندره خانه ده بوبو قیامت صارا میان آیوانه جور جیما بد

یاواش یاواش شندره چوم وازا به شندره قورصه هاچینه تازا به

شندره چوم تا دکفه به زن مار هاچین خوره گریه کونه زار زار

شندره زن ماره دیلام بوسوخته شندره یا هیچئ اویا نوگفته

ایتا آیه شندره یا واورسه ایجور واورسه شندره نترسه

بوگو بینم شندره جان چئ بوبو چره تئ جان آتو هاچین جیجا بو

شندره یام هامما گه با آبو تاب هرچئ بیده یا نیده لاب بئ حیساب

مردومانام تام بزه ساکیتا بید شندره حرفانه ره لاب تشنه بید

هاتو گه از کومیته چیو زندان چوتو هاما آخوند بوگوده اعدام

بوگفته هائ بوگفته هائ کخ بوگود شندره بیچاره هاچین چف بوگود

شندره زن مار ایدفا داد آیه هامما گه را بیشید بدا باد بایه

وسته بیشید چئ از آمئ جان خوایید شندره پاک بمرده ده چئ خوایید

شندره زن مارا گه ساکیتا بو مردومه بیچاره یه تو ولا کون

بجائ داد زن به مئ پوشتا بمال داد چئ زنئ آخه مئ جانه زن مار

شندره زن لاب هاچینه خوشکا به شندره حرفانا کرا ایشتاوه

یاواشیکئ شندریا واورسه کئ چئ بوبو خو مارا ده نترسه

شندره خو زناکا گه تو چئ گئ ایچئ دیگه وا ده الان تو بیگیئ

من کرا ویشتایئ جا مردان درم زخمه تبه جا کرا سوختان درم

ماسته مانستن مرا پاستن نوا آیوانه سر مردومه داشتن نوا

ایچئ باور مئ گولئ ده خوشکا بو زالاش باورده هاچینه توشکا بو

شندره ناله زناکه قاقا بون همسایه دارسایه کرا شون آمون

زندگئ ده شندره ره رو بامو بدبیارئ بد بیارئ رو بامو

روزان بوبو خانه نیشین شندره شندره دیل میدانه پر زن دره

شندره دیل خانه قرار نیگیفتئ بازاره سر شونه بهانه گیفتئ

گایئ واکفتئ زناکا هیچئ ره فوش دایئ زن مارا ایتا فیللئ ره

ایوار ده یئ کرده خالا بشکنه چاچه دیمه بشقابانا بشکنه

ایوار ده یئ دکفته مرغه لانه مورغانه هیشکه ننایئ ایدانه

خو سرا گایئ نایئ کیشکانه سر کولوشکنا فورادئ ایوانه سر

ایوانه سر حصیر بوبو خرابه تومامه آیوان هاچینه چل آبه

شندره پاک بوبوسته بو ولوله تکان خوره خوزناکه جان دره

شندره زخمان ده کرا چاقا بو شندره زن ماره هاچین هارا بو

زندگئ هانده اونه ره زارا بو کوکو واگردسته شیش ایندازا بو

هیشکئ نوبو شندره ره هوادار شندره هانده تورا بو با زن مار

دو واره شندره دکفته بازار خوروس نخوانده وا بوشوبئ بازار

وختئ شویئ شندره قهوه خانه مردومه گفتئ دوره یه زندانه





شندره ده کرا سیاسئ بوبو خو همسلامالانه من چی بوبو!؟

گا گلفان بحثه سیاسئ گودئ شولوغ گودئ شوعار دایئ بیخودئ

ها داد و فریاده مرا جان بیگیفت هاتو خوره گوتورمایئ یاد بیگیفت

شندره ده آدما بوستان دوبو فقط خو زن ماره مرا خوب نوبو
بیرون بامو شندره از خو چاله دکفته چا شندره بئ خیاله

نانه چئ آتشه میان دکفته بیدار نوبو شندرا خاب ببرده

خیال گودئ سیاسئ بون هاچینه سیاستام خانه دوره پرچینه

تا کئ ایروز خیابانا شون دوبو شهردارئ میدان فارسه جا نوبو

میدانه من ایسابو چندتا پاسدار ایتا آخونده چل پدر علمدار

بولون گوپوشت آخوند کرا داد زه یئ مالوم نوبو داد زه یئ یا زار زه یئ

هیشکئ اونا گوش ندایید مردومان مونتظره جرقه بید آدمان

ایتا جیوانه دسه دس بند بزه ایتام او مردومانه من شیب بزه

شندره شیش دونگه حواس جیما بو ایوار بیدم شندره لاب شیرا بو

بدا بگم شندره وضع چوتو یه او مردومانه من کرا ولویه

شندره دیم پر هاچینه کالا بو ویشتایئ جا هاچین کرا خاشا بو





خاشا بو لاب خوره هاتو کس بکس زندانه جا بامو بوبوسته نترس

کت آنه شین شندره یه پاره یه خالئ جیبه پینیک بزه پاره یه

تازه اونه شلاقه جا چاقا بو شندره بیکارئ جا لاب قاقا بو

جیگیفته از هرچئ پولو پلایه بئ پولئ یا بد جورئ موبتلایه

جوفت زنه شندره کرا تاک آره شندره زندگه بزور تاب آره

آخونده ریشو پشما جا دیلخوره هامش گه موللا کرا مورده خوره

پن زاره ره سگ زه یئ آ آخوندئ(3) الان بوبوسته حاکیمه شهر و ده

3)اصلئ آتویه : پن زاره ره سگ زه یئ کوس پراخار......الان بوبو حاکیمه شهرو دیهات

خو دیله من گه چئ دارم دبازم هایا واسئ من ایتا شر بسازم

شورو کونه هاتو خوره فوش داهان یاواشیکئ آنا اونا هول داهان

دوز دوزیکئ داد زنه: بئ گونایه آخونده چل پدر خودش بلایه(4)

4) اصلش آتویه : آخونده خارکوسته خودش بلایه

هاتو کرا مردومه من شون دره شندره لاب آتشا فو زن دره
لاف تاوه دا شندره کارو بارا بازین بوگفت الان وخته فراره





شهردارئ جان فرار بوگود شندره نفس کرا بیگیفته مردان دره

نفس نفس زن دره راه شوندره کوزه گران فان رسه کفتان دره

کوچانه من شندره جا ما ناره شلمانه پوشت جوخوفته نه جا ناره

تا فارسه شندره میدانه سر شندره کار بو کرا میدانه سر

نفس بیگیفته شندره خسته یه زالاش باورده شندره تشنه یه

ها کارانه جا شندره دیل خوشه اگر چئ دونباله سولاخه موشه

محلانا ایتا ایتا دور زنه چاره ناره هاچین خوره قور زنه

دانشسرا ساغرسازان صیغلان مس گرانه راستا بوشو تا میدان





مشته تقئ بیساطه ور پا ایسه ایپچه بوپوخوسته خوجا گاز بزه

مشته تقئ داد بزه : اه شندره چیسه بازام جه تو کرا شون دره

شکم تیشین سیرا بو میدان نایئ کار نوکونئ بار نوکونئ چئ کونئ

چره آتو تئ رنگو رو کالا بو واپلکسه تئ دیم چره چالا بو

تئ جوله گوشت کویا بوشو شندره چره آخه جه تو همش شون دره

تئ دیم پرا بوشور آخه شندره نانم چره تو واهیلئ پندره

شندره گه هیچئ نوگو مش تقئ چره تو دایم مره لاب گرزکئ

خانه خاراس واترکسم گوشنیگئ تونام مرا خالئ فقط فوش دیهئ

هاچین تره چکن زنئ مش تقئ حرف کئ زنم مره کونئ برزخئ





واکفتمه جانه تو لاب پرکمه مره هاچین تو خورمه گردمه

تونام فقط مرا دینئ شیرا بئ هیچئ نگم تو ده مرا وا ندئ

کلاچه سر قوپه ناها مش تقئ کلاچ خودش خبر ناره مش تقئ

مش تقئ قاقا به اونا فان دره موشترئ تا ایه اونا وا دیهه

شندره چن ساعتئ علافا به مش تقئ شوخئ مرا آراما به

را دکفه تا کئ بشه بخانه دیفاره کش شندره لاب حایرانه

شندره فکرا شو چره بئ پوله زندگئ آب اونه همیشه توله





نه کار داره نه بار داره نه خانه پاک ده ایسه شندره پاره ماره

خو دیله من گه چره مئ زندگئ کولکه باورده کونمه بندگئ

بوجور بوجوران آمه را چاپیدئ بیجیر بیجیران آمانام قاقیمئ

هاچین بجانه هم دریم ماتلیم گوشنه همش سر به موتکا نیهیم

هیزار هیزاران همه خانه خراب تا بوقه سگ جان کنیمئ کونیم کار

هاچین کرا کس کسه ره دوشمنیم ایلقمه نانا کسه جان قاب زنیم

آما واسئ هاتو کرا خاشا بیم کس کسه ره هاچین کرا شاخا بیم





بازین بوجوران آمه را بچاپید قوروم ساقان همه چئ یا بقاپید

جنگه ره وا اما بیبیم جلو دار گوشته دمه توپه چهارتا پولدار

خیال کونئ آ خاکه من حق ناریم مجلسه مردوم فوروشا کار ناریم

گاگلفان خرا کونید مردوما جاکشا قالب کونیدئ مردوما

بازین هاجاکش کرا به اجنبئ هاچین خو ناما نیهه اینتخابئ

ایتا کرا داد زنه گه چمچینم اویتا کرا داد زنه گه پرچینم

هاتو کرا بیمئ هاچین گوز بجیب تا آکه دولت وا ببه نانجیب

مملکتام کئ جنگله مولایه آمئ سرام تا بیگئ بئ کولایه

آخونده زائ یکشبه پولدارا به شندره با ایتا کوپن هارا به

آمئ جیوانانا نیهید سره کار چهارتا بیکارا کونید هاچین هار

توفنگو چاقو چوماقو پنجه بوکس ماشینه گشت کمیته چئ یه دیوس

ایتا کرا صاب زمانه سربازه ایتا کئ لاما بوسته گه جانبازه

ایتا کرا مونگوله حیزبول لایئ اویتا آخونده ماره مرد کولایئ

بازین هیزارتا نام نیهید آمئ سر جاسوس و دوز و کرا بیگانه سر

جوم بوخورئ چوماق تئ رافا ایسا دولته دیوس کرا بیکار ایسا

شندره کوچانه میان شون دره پاک ده هاچین آتشا بوستان دره





تا فارسه بخانه پرچینه کش در کئ ناره حلب دوسته با کش

باد کئ آیه حلب خوره کس بکس شندره هائ فوش خوره زنماره دس

یانئ چره عورضه نارئ شندره چره ایتا مٍخ نزنئ در پره

درجه که آبچین ایطرف جلاسته دیفاره گیل وارشه جا فو ووسته





چکه کونه خانه سوان پالانه وارش کئ به خانه پور از تیانه

حیاط کرا نیصفه روبار کناره روباره دم دیفار کرا گوماره

خانه سرام نیصفه کرا گالئ پوش نیصفه دیگه صافه جلب با چوکوش

ها خانه من شندره موستاجره صابخانه یام شندره جان بدتره

خولاصه شندره آیه خانه من دسته خالئ سر بیجیره خانه من

مرداکه دس خالئ ببه خانه من هاممه اونا فوقوفته به خانه من

جه دربیگیرتاکئ جه دارودیفار مرداکه یا هاچین کونید زهره مار

هیچئ نیگه شندره به گوشه گیر زبان بدان ناره ایسه سر بیجیر

خیاله موش بوبوسته ده شندره آتشه خاکه جیر بوره شندره

فو بزنئ ول گیره لاب شواله چو بزنئ سر نیهه لاب به ناله

چراغ کرا نفت نداره خاموشه حیاطه من هیمه کله آتشه

شندره فان دره کرا زناکا خوایه بشه ناز بده خو زناکا





زنائ ایجور پوشتا کونه شندرا خیال کونئ شندرا فوش دان دره

فهمه کئ ده هوا پسه شندره شندره ویشتر خورا خوردان دره

شندره زن مار گه ویرئ ویشتایئ دراسانه سر چره تو نیشته یئ

هاکارانا کونئ تئ کار جور نایه سرپا دیمیشتنه مرا جور نایه

نخ تیشینئ توشکه خوره اورسیفه کهنه ویریسه مانستن ورسیفه

مئ باغه تورب جه شندره بختره شندره بیچاره جه تورب بدتره

شندره شیب زنه یانئ نیشتاوم مئ دردانه امرا کرا گورشا بم

شندره پوستام ده کولوفتا بوسته پینه دوسته خوشکه چوبا بوسته

درازا به سر نیهه خو بازو سر دراز درازا کفه آیوانه سر





زالاش باورده شندره ویشتایه ناله کونه ایجور کئ کس نیشتاوه

خولاصه شب گوشنه خوسه شندره پلا خورا هیچئ نیگه شندره

صوب ویریزه شیطانا لعنت بوگود نوشوسته دیم خانه جا لاب قار بوگود

را دکفه تا بشه میدانه سر بار ببره نان بوخوره خاک بسر




کار.................
خاوره هیندوانه از را بامو اسبه ارابه ره کرا بار بامو

خالخالئ خو پالانه سر لم بدا حاجئ گدایا پوله خورد کم فادا

چورتیکایا حاجئ بیگیفه خودس ایستکانه چایه بنا میزه سر

کاشه نه سر کولئ فوجه سربسر سیفید مایئ چاپاقه سیم زرده پر

زیبیله پور کوار و توربو ککج نمک یارو رویئ تیان و گمج

تازه آغوز تورشه انار و زیتون من چه دانم گمجدانه با نوخون

شوره کولمه اشپلو مایئ دودئ زالاش باورده آدما چئ گودئ

خیکه میان پینیر هاچین پاختا بو پاچه باقلا کیسه کرا پارا بو

بازار مجه بساط اویا پهنا بو موشترئ ره یارو کرا قاقا بو





علافئ من دیچه نا تاچه برنج بینامو دوم سیایو چمپا برنج

دیفاره کش زنائ چو واش پانا گود چواشه امرا خالئ واش پانا گود

مشتئ کرا چانچو بنا دوشه سر دس اونه شین والائ خوره سربسر

ایتا کرا پالان خو دوش ناندره اویتا کرا ارابا حول دان دره

شندره یام بار زنه ارابه سر ارابه چه داد زنه گه به ببر

ارابه چئ چانه کرا زن دره قهوه چئ چایه کرا بردان دره






ایتا کرا قیمتا گفتان دره اویتا کرا فاکتورا خط زن دره

حاجئ هاتو همما آیه چورتیکا چورتیکایا بهم زنه صد دفا

شندره بارانه جورئ ماتله ارابه چه فان دره گب زن دره

شندره حوصله بسر شوندره ویشتایئ شندره جه هوش شوندره

ارابه چه شناسه لاب نداره خیال کونئ ارابه چئ براره





بوگفته ورسین کرا چانه نزن گولاب بدن منبرا هائ چو نزن

خولاصه شندره دکفته به کار سیاستا وا بدا با خو زن مار

ویشتایئ شندرا هاچین اودوشته خاشا گوده شندرا لاب بودوشته

تا کئ ایروز قهوه خانه نیشته بوم مردومه امرا کرا گب زن دوبوم

شندره از را کرا پیدا بوبو آویرا بو شندره از را بامو

کبله علئ بندا گوده شندرا شندره بیچاره نامو شون دره

نانم چره شندریا دوخاندم ایپچه اونه گوشه کونا بخواندم

شندره مئ ویرجا بامو بینیشته خیاله کئ آتشه جا دیبیشته

مره بوگفته کئ چئ بد بیاره هر چئ دو وه خیاره سر دراره

شندره مئ امرا بوبو دس خاخور بینیشته مئ ویرجا هاتو مخ بوخورد

ایوار آیه کبله علئ بازار مج شندره یا داد زنه گه اه گمج

بازام کئ تو چانه کرا زن درئ مردومه ره هاچین چئ گب زن درئ

شندره ایپچه کبلا یه فان دره یانئ اونا آتو جیواب دان دره

یککو بیدم شندره هانده قاقه دور دوره شر فان دره لاب هلاکه

تو نوگو خو زناکا از دور بیده خیال کونئ شندره یا خوشکا زه

شندره ده کبله عله وا دیهه شندره خو زناکه سمت را دیبه

شندره زن شندره ره داد زنه خو گالوشا کنه اونه سر زنه

گه کئ تره قهوه خانه نیشته یئ خبر نارم مورده یئ یا زنده یئ

ایلقمه نانه ایسامه چوم براه خاکا تئ سر ویشتایمه پا بما

نه زاکه ره ایچئ بیهم تا هسا نه ایتا قونداق چاگودم تا هسا

پستایئ هیچئ نارمه خاک بسر ایوار بیدئ زائ بزامه سربسر

من کئ نانم چن قولو وا بزایم موما مراق گیره گمه بزایم

ایتا مرا گه زایمه پن قولو اویتا مرا گه زایمه شیش قولو





شکم میشین پاک ده بوبوسته انبار کرا بوبوستم ده هاچین تیلیمبار

تونام کرا هاچین ترا پرکانئ مئ دیله از قورصه کرا ترکانئ

چره خجالت نکشئ شندره صابخانه مئ سرا ده بردان دره

آخه بئ یه ایپچه فارس بمئ داد هفتا خانا دوارسته مئ فریاد

شندره چنگرا به پاک لالا به سربیجیر و خاک بسرو زارا به

گه کئ زنائ بازاره من داد نزن تئ دوما جا بدن مره داد نزن

میدانه سر تا هسا جان بکندم ویشتایئ امرا بوخودا بمردم

هرچئ دو وم مئ هشت گیروبه نویه آنهمه جان کنش مئ وض هوتویه

نانم چره جوفت زنمه تاک آیه بد بیارئ هاتو مئ دونبال آیه

زناکه بیچاره بازام خرا به شندره حرفا ایشتاوه شولا به

شندره شه زناکه امرا خانه شندره زنمار زنه هانده چانه

شندره زنمار بینوخون جوش زنه شندره کیبریت چوبا خو گوش زنه

شندره زن بکفته ایوانه سر شندره سر هاچین سگه صارا سر

هاتو خوره مه یتا بو فان دره کرده خالا بدس بیگیفته داره

چاچه کنار خوشکا بو سرپا ایسا خیالا شو پاک ده او دونیا ایسا

مورغه لانه در هاتویئ وازا بو خورس کله لانه جا بیرون بامو

هوا کرا تاریکا بوستان دره شندره ده نانه چئ گفتان دره

شندره لاب راز و نیازا دره خیال کونئ شندره چا من دره

صدا بیگیفته یه هاچین ناله یه از کوچیکئ شندره بد طاله یه

خوره گه بیچاره بدونیا باموم ها ندارئ امرا مره پیل لا بوم

هسا کئ ناجه مرا مردان درم ها ندارئ من چره پئر بون درم

آسمانا فان دره لاب قاقا بو شندره بیچاره کرا زارا بو

خانا کرا فان دره دورسفته یه زناکه ویرجا کرا ورسفته یه





گورشا بو شندره جه آ زندگئ زل له بوبو جه آن همه بندگئ

تا کئ آیه شندره ایوانه سر خو زناکه ور نیشینه سفره سر

ایوار بیده زناکه دیم کالا بو رنگ بپرسته هامه چئ تارا بو

زنائ کرا داد زنه آئ بمردم فارس مرا درده جا لاب دمردم

وا بدا شندره هاچین پلایا بیگیفته خو زناکه دستو پایا

زناکه دیم پرا هاتو شه بزه شندره خو زناکا هائ دیل بزه

بداد بامو شندره جانه زن مار ویرئ بوشو موما باور ده برار

آخه چره ماستا مانئ شندره مئ زائ کراجه امئ دس شون دره

شندره دو وه هاچینه مثله باد شندره تاب ناره ایسه بئ قرار

خو دیله من گه آخه خاکا تئ سر بیچاره ره زائ دارئ آخه چیسه

الان اگه تئ وض ایجور دیگه بو خانه تیشین ویلایه در بسته بو

دوا یو دوکتور ناهابو سر بسر زایشکا یو پرستارام دس فارس

بجائ پابرانده آتو بو دو وئ مریضخانه ماشینه من نیشته بئ

اوتاقه من لم بدابئ موبله سر را شویئ دمپایئ تئ پا قالئ سر

شب پاسئ ره هیزارنفر تئ مهمان شولوغ گودید خانه میان فراوان

تئ زاکه ره همه چئ آماده بو لیباسو قونداقئ یو گاواره بو

نه تئ زناکه رنگه رو کالا بو نه ایتا دورسفته تئ صابخانه بو

تئ زاکه ره لهاف دوشک بودوخته تئ زنو زاکه ره تئ دیل نوسوخته

بجائ ماتم کرا شادئ گودئ تئ زنو زاکه مرا لاب کیف گودئ

هاتو کرا شندره جوش زن دره ماتور سوارا بیده داد زن دره

شندره دو وه هاتو پا برانده داد زنه لاب مثله آویره مانده

تا فارسه شندره خو زناکا موما ناورده کرا کار تمامه

خولاصه چئ بدم ترا درده سر شندره زن بزا دو تا گول پسر

ایتا اونه ناما بنا تاج بسر اویتایا نام بنا کرا شاه پسر





کولا کرا ناره بنه زاکه سر بازین اونه ناما نیهه تاج بسر

شندره بیچاره هاچین خاک بسر خو پسره ناما بنا شاه پسر

خیالا شو شب پاسئ ره شندره ختنه سورانه ره هاچین چرچره

گه کئ اگه بداشتیبیم چئ گودیم مئ پسرانه مرا لاب کیف گودیم

شام داییمئ تومامه مردومانا خبر داییم هممه تا همسادانا

میدانه سر کبله عله آوردیم ارابه چئ مشته تقه آوردیم

صارا میان کله ناییم تته رج تئ یان ناییم ایتا ایتا با گمج

پلا خوروش جه هر رقم کئ بیگئ شوره کولمه آشپلو مایئ فیویج

هفتا بیجارا ناییم با نوقولدان قورئ چایئ دس آب لگن با قابدان





آیوانه سر سفره ناییم سراسر مئ زناکه جا چاگودیم سفره سر

ایوار بیده زنائ کرا داد کونه شندره بیچاره ره فریاد کونه

گه کئ آخه ویشتایئ مردان درم ایچکه آب فادن کئ کفتان درم

ایچکه آب مئ گولئ من دون کونئ صارا میان سرپا ایسائ چئ کونئ

تو ده عزب اوقلئ نئ یئ شندره دو تا پسر تئ کونه دونبال دره

بزا پسئ نفس میشین شون دره چره میداد فان رسئ تو شندره

شندره آئ شندره آئ شندره آخه چره همش جه تو شون دره

تو کئ آتو فینگئ نیبئ خاک بسر مئ داد فارس خاکه دو عالم تئ سر





خیاله کئ شندره خابا شو بو جه او شیرین خاب کرا بیدارا بو

خو سر اوضا یا ایپیچه فان دره خو زناکو با دو تا زاکا دینه

همه چئ او خانه میان رو بامو شندره زن مار ده کرا گوما بو

شندره پاک قاقه دهن دوسته هیچئ نیگه لاب کرا لالا بوسته

هامما واسئ پلا بده شندره خودش کرا بیچاره مردان دره

خولاصه شندره پنایئ ناره خو موشکیله چاره یه راهئ ناره

نه کار داره نا بار داره نه بیمه مملکته من بوبوسته خوشکه هیمه

واستئ هاتو آتشه من بوسوجه دولته دیل شندره ره نوسوجه

جه مملکت سهمئ ناره شندره شندره آ خاکه میان منتره

نه نفته جان سهمئ داره شندره نه مجلسو دولته شر بون دره

هاتو کرا ها خاکه من خاشیدئ مملکتا سبزا گودید واشیدئ

تا تانیدئ جان کنیدئ زنده یید وختئ پیرا بید هاچینه مورده یید

دولته ره فرق نوکونه آدمان مورده و یا زنده بیبید مردومان

هدف فقط چاپسنه مردومه کارئ بکارش نداره موهمه

چره واسئ شندره لاب قاقا به ویشتایئ امرا هاتویئ ابا به

وختئ ناره کارو ناره آبو نان خانه ناره پانه ناره بئ سامان





دولت و مجلس وا ببه سرپناه شندره آدمانه پوشته پناه

شندره واستئ دولته شاخا به تا کئ آ مردومانه ره را واوه

ناویره وا ها آش ببه ها کاسه شندره آدمانه ره نسازه

خولاصه چئ بگم جه مئ شندره آخاکه من شندره تر بون دره

بفکرا شو خو کولیه یا بوفروشه خو کول یانه جا ایتا بوفروشه





هرجیگا شه هیشکئ نئ یه خریدار کولیه فوروشان هاتویئ صف ایساد

ایتا بامو خو نوبتا بوفروشه شندره یا نوبته خوب بوفروشه

شندره نوبا هینه به اولئ کولیه فوروشانه میان سوگلئ

گه کئ جوتو بوبوسته من اولم من کئ همش نوبته من آخرم

تا کئ جه راه بامو ایتا کولیه خر شندره هائ چانه زنه گه بخر

فارسئ کرا شندره گب زن دره کولیه شناس بوبوسته گفتان دره

کولیه ئ من جانه شوما سالمه حرف نداره کار مئ کنه قایمه

تا هسا نه دوا دیده نه دوکتور کار مئ کنه کولیه مثاله شوتور

یارو کرا شندره جان خوش بامو شندره کولیا بیهه پس هوش بامو

شندره وض ایپچه تکانئ بوخورد کولیه پوله امرا غذایئ بوخورد

خو زاکانه رخت و لیباسئ بیهه تاج بسر و شاه پسره چرخ بیهه

خانه کرایا فادا صابخانه یا ایپچه صفایئ بدا او خانه یا

ایروز کرا ایوانه سر نیشته بو تب بوگوده شندرا شه بزه بو

شوخئ گودئ شندره امرا زن مار گفتئ تونام آخه بوبوئ شکم دار

چوتو شکم دارا بویئ شندره گوسکا کرا تئ شکمه من دره

شندره تام بزه درازا کفته مالوم نئ یه بمرده یا کئ خوفته

هاچین خوره رازو نیازا دره مرگه تبه جا گورشه کا بون دره

شندره هائ ایمروزو فردا کونه دوعا کونه خودا خودا یا کونه

هاتو کرا شندره لاب آبا بو شندره بیچاره شکم بادا بو

شندره یا مریضخانه ببردید همه گیدئ شندرا دئر باوردید

لاب خو گولئ پوستا گیره شندره مینت کوته پرستاره دوکتوره

شندره زن خو سرو جانا زنه شندره بیچاره هاچین داد زنه





پرستارام خوره هاچین دور زنه دوکتوره خطا نخوانه قور زنه

هیشکئ به هیشکئ نئ یه گاب دکفته هرکئ پولو پارتئ ناره بمرده

شندره بئ کس کرا تنها ایسا گایئ بکفته گایئ سرپا ایسا

نفس ناره شندره مردان دره شندره بیهوش بوبو کفتان دره

تو نوگو بیچارا عمل خوب نوگود شندره اویتا کولیه یام چرک بوگود

کس نئ یاره بگه آخه چئ بوبو شندره بیچاره چره خوب نوبو

هیشکئ ره توفیر ناره کئ شندره پور ده ننا شندره لاب شوندره

شندره پاک نا ناره بیهوشه ده اوتاقه کش کفته هاچین موشه ده

شندره ول نیگیفته گورشا بوسته شندره ره زندگئ تورشا بوسته

بمرده بیچاره بوشو خاکه جیر دمخته قبرانه مئ یان نام آویر

آخاکه من هاچین پوره شندره شندره لاب شندره تر بون دره

هاتو کرا شندرانا اودوشید جوم نوخورید هاما واسئ بوکوشید

شندره آئ شندره آئ شندره هیزار هیزار کولا تئ سر شون دره





تئ پا جیرئ طلایا بردان درید بازین ترا ویشتایئ کوشتان درید

تئ سرا دولت هاتو شیره ماله آخر پسئ همش تره شر واره

ایلقمه نانه ماتلئ شندره چره تئ حقا فانگیرئ شندره

تا تو تئ حقا فان گیرئ شندره هاتو واسئ فنا بیبئ شندره

هرماله تئ درده دوایئ ننا تئ خاکه من همش سیوایئ ناها