تا آکه
بئ وطن میدان دکفته خالئ میدان تا آکه
ابره پوشت ماه دیل بترکه بئ خوروسخوان تا آکه



تا آکه جنگل واسوجه بئ ایتا سرپور بدوش

سر بچاه بردن دمردن گورشا بوستن تا آکه

باغه دیل واهیلا بو بسکئ بیده پیسه کلاچ

بولبوله بالا دوسته چومه گریان تا آکه

وامرازه بئ پهلوانئ بون یالانچئ پهلوان

اختا بوستن یا نامون مردانه میدان تا آکه

روزگاره بئ کسئ من واستئ یارئ داب گودن

کس کسا بیگانه بوستن سر به داران تا آکه

وسته ده هائ آهو ناله بیخودئ فردا گودن

تا آکه واستئ دمردن گورشا بوستن تا آکه

آئ شومایان کئ دباختید هستو نیست دارو ندار

وقته ده میدان دکفتن خالئ میدان تا آکه

گیل آوایئ بئ کولوشکن جنگله بئ دار و خال

وسته تنهایئ جوخوفتن چوم دوستن تا آکه

وارگان
مرا بیگیر تو مثاله واشوسته رخت وارگان
مرا فیچال بتکان تئ تلاره سر وارگان

مرا بیگیر تو چاکون صحرا خاکه ره کشخال

مرا جلاسته جه شاخه مثاله ولگ وارگان

مرا بدار تئ تیلیمباره ره ببم سردئ

مرا مثاله کولوش پاک تئ گابه ره وارگان

مرا اوسان تئ بیجاره چاکون ایتا گرواز

مرا تئ خوج دارانه مثله داره پا وارگان

مرا بدار تئ کوتامه ببم واشاده حصیر

مرا مثاله ویریس از کوتامه جور وارگان

مرا بدار کئ تئ کیشکانه ره ببم بپپا

مرا مثاله هلاچین تئ زاکه ره وارگان

مرا تو بازئ بیگیر با زاکان هوا بوگوروز

مرا تئ ویرجا بدار هر جیگا خایئ وارگان

مرا ولان کئ آتو تاسیانئ جان واسوجم

مرا مئ خاکه مئ یان هر جیگا تانئ وارگان

مرا چاکون تئ گمج تئ نوخون خومه پیته

مرا نیگیر آتو بئ پا غریبه جا وارگان

هاما سیوا بوگوده
نانم زمانه چره هامما کله پا بوگوده
فاگیفته عورضه یا هاما آتوخفا بوگوده

نانم چره بامو آنقد بلا ملا آمئ سر

کئ هرچئ جوروجفایا آتو روا بوگوده

چوتو دکفته آ میدان بدسته ان همه گاب

چره زمانه آتو گابه کوس به پا بوگوده

چره بوبوسته داریم هاممه من مرا قوربان

بازین ها خاک بسرئ هر گمه جا شاه بوگوده

هاچین کرا امرا پرکانیم هامه قاقید

بیدین زمانه چوتو خاش والیس به را بوگوده

مئ دس چوپور نایه سرده زمانه دیل ده دمرد

فوقوفته شب هامه تانا بئ دستو پا بوگوده

دپرک ریفق کرا آنقد نوبو اسیره خیال
کئ خوش خیالئ کرا ناکسانه جا واگوده

گیل آوایئ نوکونه بیخودئ خو سینا چاک

واکفته بسکئ زمانه هاما سیوا بوگوده



کئ شب نه پا به گوروز


چره واسئ جه وطن بون همیشه پا به گوروز

چره واسئ آتو آردن بیگانا سر به فروز

چره واسئ جوخوسیم حرفه حقه گفتنه ره

چره واسئ ببه حاکم آمئ وطن ایتا دوز

چره همش آمئ سهمه هیزار هیزار اعدام

چره شکنجه یو زندان آمئ زاکان هر روز

چره دوروغو خورافا هاتو کونیم باور

چره واسئ بداریم ناجه از آمئ دیروز

چره کولوشکن آمئ شین خو کیشکانا فوداره

چره وطن بشه آخه بدسته آن همه دوز

چره اما دریم آخه آتویئ کس کسه جان

بازین ببه آمئ دولت ایتا پیله دیوس

ویریز! نینیش! دوارسته هاما ده خاک بسرئ

نواستئ هائ فوقوسیم کس کسا، بیبیم بیبیم دیلسوز

وطن تئ رافا ایسا وا همه بیبیم میرزا

ده وخته جنگله وسته آتو بیبیم سیا روز

گیل آوایئ بنه سر پور تئ دوش دکف جنگل

هارائ بزن همه تانا کئ شب نه پا به گوروز


فان درم
ديل خايه هانده خيالا شم تئ جايا فان درم
تئ كمر چادور فوزه تئ اوصفايا فاندرم

فاندرم تا همساده خانه شه تئ كتله صدا

چاچه دم تئ آب واقوشتن سرصدایا فاندرم

باغه من وختئ چینئ سير و كوارا با گولاز

مستا بم تئ او حوضوره خوش ادایا فان درم

تا خوانه داره لچه او کشکرت با دادو قال

ناز دیهئ تو کشکرت تئ او نیگایا فان درم

وختئ غم دیلا فوتورکه تو کرا بئ مئ پنا

تئ کشه آراما بون تئ دسکلایا فان درم

دیل خایه تئ ویرجا بسم تا گیرئ تو دس نماز

جانمازه سر تئ او صلحو صفایا فان درم

دیل دمرده بئ تو دورئ تاسیانئ بد فوقوفت

آخ آکه به هانده تئ ور تئ نیگا یا فان درم

گیل آوایئ تو بنه دیمه تئ اشکو ناله آه

وستا کون با گریه گفتن هائ تئ رایا فان درم